ബെംഗളൂരു എഫ് സി ഫൈനല്‍ ഉറപ്പിച്ചു. ഇന്ന് ക്യാപ്റ്റന്‍ സുനില്‍ ഛേത്രിയുടെ തോളിലേറിയാണ് ബെംഗളൂരു ഫൈനലിലേക്ക് മാര്‍ച്ച്‌ ചെയ്തത്. ഇന്ന് നടന്ന രണ്ടാം പാദ സെമിയില്‍ ഒന്നിനെതിരെ മൂന്ന് ഗോളുകള്‍ക്ക് പൂനെ സിറ്റിയെ തോല്‍പ്പിച്ചാണ് ബെംഗളൂരിവിന്റെ മുന്നേറ്റം. ബെംഗളൂരുവിന്റെ മൂന്ന് ഗോളുകളും ഛേത്രിയുടെ വകയായിരുന്നു.
ഗോള്‍ രഹിതമായി അവസാനിച്ച ആദ്യ പാദ സെമിക്ക് ശേഷം കണ്ടീരവയില്‍ എത്തിയ ടീമുകളെ നിറഞ്ഞ സ്റ്റേഡിയമാണ് സ്വീകരിച്ചത്. എവേ ടീമായ പൂനെ ആയിരുന്നു തുടക്കത്തില്‍ മുന്നേറ്റങ്ങള്‍ നടത്തിയത്. പക്ഷെ ഗുര്‍പ്രീത് ബെംഗളൂരുവിന്റെ രക്ഷകനായി ആ ആക്രമണങ്ങള്‍ക്ക് മുന്നില്‍ അവതരിച്ചു. പതിനഞ്ചാം മിനുട്ടില്‍ പൂനെ ഡിഫന്‍സിന്റെ പിഴവ് മുതലെടുത്തായിരുന്നു ഛേത്രിയുടെ ആദ്യ ഗോള്‍.
ഗോളിന് ശേഷം കളി വരുതിയിലാക്കിയ ബെംഗളൂരു രണ്ടാം പകുതിയില്‍ 65ആം മിനുട്ടില്‍ പെനാള്‍ട്ടിയിലൂടെ ലീഡ് ഇരട്ടിയാക്കി. പെനാള്‍ട്ടി സ്പോട്ടില്‍ നിന്ന് ഗോള്‍ കീപ്പറെ ചിപ് ചെയ്ത് കൊണ്ട് ഛേത്രി തന്നെയാണ് ഗോള്‍ നേടിയത്. കളി കൈവിട്ട് എന്ന് കരുതി പൂനെ സിറ്റി നില്‍ക്കുമ്ബോഴാണ് സൂപ്പര്‍ സബ് ആയി എത്തിയ ജോണത്താന്‍ ലൂക്ക ഒരു ഗംഭീര ഫ്രീ കിക്കിലൂടെ പൂനെയെ മത്സരത്തിലേക്ക് തിരികെയെത്തിച്ചത്.
82ആം മിനുട്ടിലെ പൂനെ ഗോള്‍ ബെംഗളൂരുവിന് സമ്മര്‍ദ്ദത്തിന്റെ നിമിഷങ്ങളാണ് അവസാനം നല്‍കിയത്. സമനില നേടിയെങ്കില്‍ എവേ ഗോള്‍ നിയമപ്രകാരം പൂനെ സിറ്റിക്ക് ഫൈനലിലേക്ക് എത്താമായിരുന്നു. പക്ഷെ പൂനെയുടെ അറ്റാക്കിംഗ് ശ്രമത്തിനിടെ ഒരു കൗണ്ടര്‍ അറ്റാക്കിലൂടെ പൂനെ ഡിഫന്‍സിനെ കീറിമുറിച്ച്‌ ഛേത്രി തന്റെ ഹാട്രിക്കും ഫൈനലും ഉറപ്പിച്ചു.
