ചെങ്ങന്നൂര്‍ ഉപതെരഞ്ഞെടുപ്പില്‍ നിഷ്പക്ഷ രാഷ്ട്രീയമായിരിക്കും വിധി നിര്‍ണ്ണയിക്കുകയെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. നിഷ്പക്ഷ രാഷ്ട്രീയം എന്നത് അരാഷ്ട്രീയമല്ലെന്നും ഭരണത്തിന്റെ ശരിയായ വിലയിരുത്തലാണെന്നും പറഞ്ഞ കുമ്മനം അടിമുടി അഴിമതിയിലും ജനദ്രോഹ നടപടികളിലും വീര്‍പ്പ് മുട്ടിച്ച ഉമ്മന്‍ ചാണ്ടി ഗവണ്‍മെന്റിനെ താഴെയിറക്കിയത് സിപിഐഎം അല്ലെന്നും ജനങ്ങളുടെ നിഷ്പക്ഷ നിരീക്ഷണമാണെന്നും പറയുന്നു. എല്‍ഡിഎഫ് അധികാരത്തിലെത്തിയ ശേഷം പ്രതിസന്ധികള്‍ മൂര്‍ച്ഛിക്കുകയല്ലാതെ ഒന്നിനും പരിഹാരം കണ്ടെത്താന്‍ കഴിഞ്ഞിട്ടില്ലെന്നും, ഇടത് ഭരണത്തില്‍ ജനങ്ങള്‍ പൊറുതിമുട്ടുകയാണെന്നും കുമ്മനം തന്റെ ഫെയ്സ്ബുക്കില്‍ കുറിച്ചു.
ഫേസ്ബുക് പോസ്റ്റ് കാണാം ;
ചെങ്ങന്നൂര്‍ ഉപതെരഞ്ഞെടുപ്പില്‍ നിഷ്പക്ഷ രാഷ്ട്രീയമായിരിക്കും വിധി നിര്‍ണ്ണയിക്കുക. നിഷ്പക്ഷ രാഷ്ട്രീയം എന്നത് അരാഷ്ട്രീയമല്ല. ഭരണത്തിന്റെ ശരിയായ വിലയിരുത്തലാണ്. ബദല്‍ ചിന്തയാണ്. അടിമുടി അഴിമതിയിലും ജനദ്രോഹ നടപടികളിലും വീര്‍പ്പ് മുട്ടിച്ച ഉമ്മന്‍ ചാണ്ടി ഗവണ്‍മെന്റിനെ താഴെയിറക്കിയത് സിപിഐഎം അല്ല. ജനങ്ങളുടെ നിഷ്പക്ഷ നിരീക്ഷണമാണ്. ഈ സാധ്യത തിരിച്ചറിഞ്ഞ സിപിഐഎം എല്ലാം ശരിയാക്കാമെന്ന് ജനങ്ങള്‍ക്ക് ഉറപ്പ് നല്‍കിയാണ് അധികാരത്തിലെത്തിയത്. എന്നാല്‍ അധികാരത്തിലേറിയ പിണറായി താന്‍ ജനങ്ങള്‍ക്ക് നല്‍കിയ എല്ലാ വാഗ്ദാനങ്ങളും വിസ്മരിച്ചു.
എല്‍ഡിഎഫ് അധികാരത്തിലെത്തിയ ശേഷം പ്രതിസന്ധികള്‍ മൂര്‍ച്ഛിക്കുകയല്ലാതെ ഒന്നിനും പരിഹാരം കണ്ടെത്താന്‍ കഴിഞ്ഞില്ല. ഇടത് ഭരണത്തില്‍ ജനങ്ങള്‍ പൊറുതിമുട്ടുകയാണ്. സംസ്ഥാനം കടക്കെണിയില്‍ നിന്നും കടക്കെണിയിലേക്ക് കൂപ്പുകുത്തുന്നു. എല്ലാ പദ്ധതികളും വികസനപ്രവര്‍ത്തനങ്ങളും പാതിവഴിയില്‍ ഉപേക്ഷിക്കുകയോ നിര്‍ത്തി വയ്ക്കുകയോ ചെയ്യേണ്ടി വരുന്നു. നിത്യനിദാന ചെലവുകള്‍ക്ക് പോലും വായ്പയെ ആശ്രയിക്കേണ്ട ഗതികേടിലാണ്. കാര്‍ഷിക വ്യാവസായിക മേഖലയില്‍ പ്രതിസന്ധി മൂര്‍ച്ഛിച്ചു. തൊഴില്‍ രാഹിത്യത്തിന്റെ സൂചിക ഉയരത്തിലേക്ക് കുതിക്കുന്നു. ഉല്പാദന മേഖലയാകെ സ്തംഭനത്തിലാണ്. ഇരുണ്ട ഭാവിയാണ് യുവാക്കളെ ഉറ്റുനോക്കുന്നത്. പ്രതീക്ഷയുടെ ഒരു മരുപ്പച്ച പോലും അവരുടെ മുന്നിലില്ല.
ഇടതുപക്ഷ ഗവണ്‍മെന്റിനെ നയിക്കുന്ന സിപിഐഎം ഇല്ലാതാക്കുന്നത് രാഷ്ട്രീയ പ്രതിയോഗികളെയാണ്, അല്ലാതെ ദാരിദ്രത്തെയോ, തൊഴിലില്ലായ്മയെയോ അല്ല. കൊലപാതകങ്ങളുടേയും സ്ത്രീപീഢനങ്ങളുടേയും നിരക്കില്‍ മാത്രമേ പുരോഗതിയുള്ളു. തൊഴില്‍രാഹിത്യവും പ്രതിശീര്‍ഷ വരുമാനത്തില്‍ സംഭവിച്ച ശോഷണവും, നിത്യോപയോഗ സാധനങ്ങളുടെ വിലവര്‍ധനയും കാര്‍ഷികമേഖലയിലെ വിലത്തകര്‍ച്ചയും ജനങ്ങളുടെ കുടുംബ ബജറ്റിനെ താറുമാറാക്കിയിരിക്കുന്നു. കേരളത്തിന്റെ ഈ വര്‍ത്തമാനകാല സാഹചര്യം തിരിച്ചറിയുന്നവരാണ് നിഷ്പക്ഷ രാഷ്ട്രീയം പുലര്‍ത്തുന്നവര്‍. അവരായിരിക്കും ചെങ്ങന്നൂര്‍ തെരഞ്ഞെടുപ്പിന്റെ വിധി നിര്‍ണ്ണയിക്കുക, കുമ്മനം കൂട്ടിച്ചേര്‍ത്തു.
