ന്യൂഡല്‍ഹി: ഉന്നാവോ, കത്വ പീഡനങ്ങളില്‍ നീതി ആവശ്യപ്പെട്ട് ഇന്ത്യാഗേറ്റില്‍ കോണ്‍ഗ്രസ് നേതൃത്വത്തില്‍ നടത്തിയ മെഴുകുതിരി പ്രതിഷേധത്തില്‍ താരമായി തിളങ്ങി പ്രിയങ്ക ഗാന്ധി. രാത്രി പന്ത്രണ്ടിന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി, ഭര്‍ത്താവ് റോബര്‍ട്ട് വാധ്ര, മറ്റു കോണ്‍ഗ്രസ് നേതാക്കള്‍ എന്നിവര്‍ക്കൊപ്പമാണ് പ്രിയങ്ക ഇന്ത്യാ ഗേറ്റിലെത്തിയത്.
പ്രതിഷേധത്തിനായി ആയിരങ്ങളാണ് ഒത്തുകൂടിയത്. ഇതിനിടെ ഉന്തുംതള്ളും ബഹളവുമുണ്ടാക്കിയവരോടു പ്രിയങ്ക ക്ഷുഭിതയായി. ഉന്തുംതള്ളുമുണ്ടാക്കുന്നവര്‍ വീടുകളിലേക്കു മടങ്ങൂ. സമാധാനത്തില്‍ നിശബ്ദമായി നടക്കൂ. എന്തിനാണ് ഇവിടെ വന്നിരിക്കുന്നത് എന്നതിനെ കുറിച്ച്‌ ഓര്‍ക്കുക- പ്രിയങ്ക പറഞ്ഞതായി പിടിഐ റിപ്പോര്‍ട്ട് ചെയ്യുന്നു.
പ്രവര്‍ത്തകരുടെ തിക്കും തിരക്കും വകവയ്ക്കാതെ അമര്‍ ജവാന്‍ ജ്യോതിക്കു സമീപത്ത് അണികള്‍ക്കൊപ്പം മുഴുവന്‍ സമയവും പ്രിയങ്കയുണ്ടായിരുന്നു. ഡല്‍ഹിയില്‍ കൂട്ട ബലാത്സംഗത്തിനിരയായി കൊല്ലപ്പെട്ട നിര്‍ഭയയുടെ മാതാപിതാക്കളും പ്രതിഷേധത്തില്‍ പങ്കെടുത്തു.
